ਚੜ੍ਹਦੀਕਲਾ ਡਾਟ ਕਾਮ ਵਲੋਂ ਅੱਜ ਦੀਆਂ ਤਾਜ਼ਾ ਖ਼ਬਰਾਂ

ਡਾਂਬੁਲਾ 26 ਅਗਸਤ-
        ਆਪਣੀ ਵਿਸਫੋਟਕ ਬੱਲੇਬਾਜ਼ੀ ਲਈ ਪੂਰੀ ਦੁਨੀਆ 'ਚ ਮਸ਼ਹੂਰ ਭਾਰਤੀ ਸਲਾਮੀ ਬੱਲੇਬਾਜ਼ ਵਿਰੇਂਦਰ ਸਹਿਵਾਗ ਨੇ ਇਕ ਦਿਨਾ ਮੈਚਾਂ 'ਚ 1000 ਚੌਕੇ ਪੂਰੇ ਕਰ ਲਏ ਹਨ। 
        ਆਪਣਾ 227ਵਾਂ ਮੈਚ ਖੇਡ ਰਹੇ ਸਹਿਵਾਗ ਨੇ ਨਿਊਜ਼ੀਲੈਂਡ ਵਿਰੁੱਧ ਮਿਲਜ਼ ਦੀਆਂ ਗੇਂਦਾਂ 'ਤੇ ਲਗਾਤਾਰ ਤਿੰਨ ਚੌਕੇ ਲਾ ਕੇ ਇਹ ਅੰਕੜਾ ਪਾਰ ਕੀਤਾ। ਇਹ ਕਾਰਨਾਮਾ ਕਰਨ ਵਾਲੇ ਉਹ 7ਵੇਂ ਬੱਲੇਬਾਜ਼ ਹਨ। ਇਕ ਦਿਨਾ ਮੈਚਾਂ 'ਚ ਸਭ ਤੋਂ ਵੱਧ ਚੌਕੇ ਲਾਉਣ ਦਾ ਰਿਕਾਰਡ ਸਚਿਨ ਤੇਂਦੂਲਕਰ ਦੇ ਨਾਂ ਹੈ। ਤੇਂਦੂਲਕਰ ਨੇ ਹੁਣ ਤੱਕ 442 ਮੈਚਾਂ 'ਚ 1927ਚੌਕੇ ਲਾਏ ਹਨ।

ਡਾਂਬੁਲਾ 26 ਅਗਸਤ-
        ਨਿਊਜ਼ੀਲੈਂਡ ਵਿਰੁੱਧ ਖੇਡੇ ਗਏ ਅਹਿਮ ਮੈਚ 'ਚ ਭਾਰਤ ਨੇ ਨਿਊਜ਼ੀਲੈਂਡ ਨੂੰ 105 ਦੌੜਾਂ ਦੇ ਵੱਡੇ ਫਰਕ ਨਾਲ ਹਰਾ ਦਿੱਤਾ। ਇਸ ਤਰ੍ਹਾਂ ਭਾਰਤ ਤਿਕੌਣੀ ਲੜੀ ਦੇ ਫਾਈਨਲ 'ਚ ਪਹੁੰਚ ਗਿਆ ਹੈ ਜਿਥੇ 28 ਅਗਸਤ ਨੂੰ ਉਸ ਦਾ ਮੁਕਾਬਲਾ ਸ਼੍ਰੀਲੰਕਾ ਨਾਲ ਹੋਵੇਗਾ। 
        ਭਾਰਤ ਵੱਲੋਂ ਬਣਾਈਆਂ 223 ਦੌੜਾਂ ਦਾ ਪਿੱਛਾ ਕਰਦਿਆਂ ਨਿਊਜ਼ੀਲੈਂਡ ਦੀ ਸਾਰੀ ਟੀਮ 30.1 ਓਵਰ 'ਚ 118 ਦੌੜਾਂ 'ਤੇ ਆਊਟ ਹੋ ਗਈ। ਭਾਰਤੀ ਗੇਂਦਬਾਜ਼ਾਂ ਨੇ ਸ਼ਾਨਦਾਰ ਗੇਂਦਬਾਜੀ ਦਾ ਪ੍ਰਦਰਸ਼ਨ ਕਰਦਿਆਂ ਮੁਨਾਫ਼ ਪਟੇਲ ਨੇ 3 ਤੇ ਪ੍ਰਵੀਨ ਕੁਮਾਰ ਨੇ 4 ਵਿਕਟਾਂ ਲਈਆਂ ਜਦਕਿ ਇਸ਼ਾਂਤ ਸ਼ਰਮਾ, ਜਡੇਜਾ ਤੇ ਨੇਹਰਾ ਨੂੰ ਇਕ-ਇਕ ਵਿਕਟ ਮਿਲੀ। 
        ਇਸ ਤੋਂ ਪਹਿਲਾਂ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਭਾਰਤੀ ਟੀਮ ਲਈ ਸਲਾਮੀ ਬੱਲੇਬਾਜ਼ ਵਿਰੇਂਦਰ ਸਹਿਵਾਗ ਨੇ ਸਭ ਤੋਂ ਵੱਧ 110 ਦੌੜਾਂ ਬਣਾਈਆਂ ਜਦਕਿ ਬਾਕੀ ਬੱਲੇਬਾਜ਼ ਸਿਰਫ 99 ਦੌੜਾਂ ਹੀ ਜੋੜ ਸਕੇ। ਭਾਰਤੀ ਟੀਮ 46.3 ਓਵਰਾਂ 'ਚ ਹੀ ਆਊਟ ਹੋ ਗਈ। 
        ਸਹਿਵਾਗ ਨੇ ਆਪਣਾ 13ਵਾਂ ਸੈਂਕੜਾ ਲਾਇਆ ਤੇ ਉਸ ਨੂੰ ਧੋਨੀ ਤੋਂ ਇਲਾਵਾ ਕਿਸੇ ਵੀ ਬੱਲੇਬਾਜ਼ ਤੋਂ ਸਹਿਯੋਗ ਨਹੀਂ ਮਿਲਿਆ। ਸਹਿਵਾਗ ਤੇ ਧੋਨੀ ਨੇ 5ਵੇਂ ਵਿਕਟ ਲਈ 107 ਦੌੜਾਂ ਦੀ ਭਾਈਵਾਲੀ ਕੀਤੀ। ਨਿਊਜ਼ੀਲੈਂਡ ਵੱਲੋਂ ਟਿਮ ਸਾਊਥੀ ਨੇ ਸਭ ਤੋਂ ਵੱਧ 4 ਵਿਕਟ ਲਏ ਜਦਕਿ ਕੇਇਲ ਮਿਲਜ਼ ਨੇ 2 ਭਾਰਤੀ ਖਿਡਾਰੀਆਂ ਨੂੰ ਆਊਟ ਕੀਤਾ।

ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ 26 ਅਗਸਤ-
        ਭਾਰਤੀ ਹਾਕੀ ਫੈਡਰੇਸ਼ਨ ਦੇ ਸਾਬਕਾ ਪ੍ਰਧਾਨ ਤੇ ਪੰਜਾਬ ਦੇ ਸਾਬਕਾ ਪੁਲਿਸ ਮੁਖੀ ਸ੍ਰੀ ਕੇ. ਪੀ. ਐਸ. ਗਿੱਲ ਨੇ ਕਿਹਾ ਹੈ ਕਿ ਕੇਂਦਰੀ ਖੇਡ ਮੰਤਰਾਲੇ ਨੂੰ ਕੌਮਾਂਤਰੀ ਹਾਕੀ ਫੈਡਰੇਸ਼ਨ ਨੂੰ ਠੋਕਵਾਂ ਜਵਾਬ ਦੇਣਾ ਚਾਹੀਦਾ ਹੈ। 
        ਉਨ੍ਹਾਂ ਮਿਸਾਲ ਦਿੰਦਿਆਂ ਕਿਹਾ ਕਿ ਚੀਨ 20 ਸਾਲ ਕੌਮਾਂਤਰੀ ਹਾਕੀ ਦੇ ਨਕਸ਼ੇ ਤੋਂ ਪਰ੍ਹੇ ਹੱਟਿਆ ਰਿਹਾ ਹੈ ਪਰ ਉਹ ਵਿਸ਼ਵ ਦੇ ਹਾਕੀ ਪ੍ਰਬੰਧਕਾਂ ਅੱਗੇ ਨਹੀਂ ਝੁਕਿਆ ਹੈ। ਸ੍ਰੀ ਗਿੱਲ ਨੇ ਅੱਜ ਇਥੇ ਪੀ. ਸੀ. ਏ.ਸਟੇਡੀਅਮ ਵਿਖੇ ਕਿਹਾ ਕਿ ਇਸ ਸਾਲ ਖੇਡੇ ਜਾਣ ਵਾਲੇ ਹਾਕੀ ਦੇ ਤਿੰਨ ਵੱਡੇ ਟੂਰਨਾਮੈਂਟ ਜਿਨ੍ਹਾਂ 28 ਅਗਸਤ ਨੂੰ ਅਰਜਨਟੀਨਾ 'ਚ ਹੋਣ ਵਾਲਾ ਮਹਿਲਾ ਵਿਸ਼ਵ ਕੱਪ, ਅਕਤੂਬਰ 'ਚ ਨਵੀਂ ਦਿੱਲੀ 'ਚ ਰਾਸ਼ਟਰਮੰਡਲ ਹਾਕੀ ਤੇ ਚੀਨ 'ਚ ਨਵੰਬਰ 'ਚ ਏਸ਼ੀਆ ਹਾਕੀ ਲਈ ਸੁਪਰੀਮ ਕੋਰਟ ਦੀ ਜੱਜਮੈਂਟ ਅਨੁਸਾਰ ਭਾਰਤੀ ਹਾਕੀ ਸੰਘ ਹੀ ਭਾਰਤੀ ਮਹਿਲਾ ਤੇ ਪੁਰਸ਼ ਹਾਕੀ ਦੀ ਅਧਿਕਾਰਤ ਬਾਡੀ ਹੋਵੇਗੀ। 
        ਸ੍ਰੀ ਗਿੱਲ ਨੇ ਕਿਹਾ ਕਿ ਕੇਂਦਰੀ ਖੇਡ ਮੰਤਰਾਲੇ ਨੇ ਵੀ ਹਾਕੀ ਇੰਡੀਆ ਨੂੰ ਭੰਗ ਕਰ ਦਿੱਤਾ ਹੈ ਤੇ ਭਾਰਤੀ ਹਾਕੀ ਸੰਘ ਨੂੰ ਮਾਨਤਾ ਦੇ ਦਿੱਤੀ ਹੈ ਜਿਸ ਸਬੰਧੀ ਕੇਂਦਰ ਸਰਕਾਰ ਵੱਲੋਂ ਕੌਮਾਂਤਰੀ ਹਾਕੀ ਸੰਘ ਨੂੰ ਸੂਚਿਤ ਕਰ ਦਿੱਤਾ ਹੈ ਪਰ ਇਸ ਦੇ ਬਿਲਕੁਲ ਉਲਟ ਫ਼ੈਸਲਾ ਲੈਂਦਿਆ ਕੌਮਾਂਤਰੀ ਹਾਕੀ ਸੰਘ ਨੇ ਹਾਕੀ ਇੰਡੀਆ ਦੀ ਮੈਂਬਰਸ਼ਿਪ ਬਰਕਰਾਰ ਰੱਖਦਿਆਂ ਭਾਰਤੀ ਖੇਡ ਮੰਤਰਾਲੇ ਨੂੰ ਕਿਹਾ ਹੈ ਕਿ ਜੇਕਰ ਹਾਕੀ ਇੰਡੀਆ ਦੀ ਮਾਨਤਾ ਰੱਦ ਕੀਤੀ ਗਈ ਤਾਂ ਭਾਰਤੀ ਮਹਿਲਾ ਤੇ ਪੁਰਸ਼ ਹਾਕੀ ਟੀਮਾਂ ਨੂੰ ਕੌਮਾਂਤਰੀ ਹਾਕੀ ਖੇਡ ਕੈਲੰਡਰ ਤੋਂ ਬਾਹਰ ਕਰ ਦਿੱਤਾ ਜਾਵੇਗਾ। 
        ਸ੍ਰੀ ਗਿੱਲ ਨੇ ਕਿਹਾ ਕਿ ਭਾਰਤ ਨੂੰ ਕਿਸੇ ਕੌਮਾਂਤਰੀ ਖੇਡ ਦਬਾਅ ਅੱਗੇ ਨਹੀਂ ਝੁਕਣਾ ਚਾਹੀਦਾ। ਸ੍ਰੀ ਗਿੱਲ ਅਨੁਸਾਰ ਕੌਮਾਂਤਰੀ ਹਾਕੀ ਸੰਘ ਨੇ ਇਹ ਧਮਕੀ ਵੀ ਦਿੱਤੀ ਕਿ ਜੇਕਰ ਭਾਰਤੀ ਹਾਕੀ ਦੇ ਪ੍ਰਬੰਧਕ ਸਹੀ ਸਮੇਂ ਬਖੇੜਾ ਖ਼ਤਮ ਨਹੀਂ ਕਰਦੇ ਤਾਂ ਉਹ ਮੇਜ਼ਬਾਨੀ ਖੋਹਣ ਜਾਂ ਭਾਰਤੀ ਹਾਕੀ ਟੀਮ 'ਤੇ ਟੂਰਨਾਮੈਂਟ ਖੇਡਣ 'ਤੇ ਵੀ ਰੋਕ ਲਗਾ ਸਕਦੇ ਹਨ। ਰਾਸ਼ਟਰ ਮੰਡਲ ਖੇਡਾਂ 'ਚ ਭ੍ਰਿਸ਼ਟਾਚਾਰ ਬਾਰੇ ਪ੍ਰਕਾਸ਼ਿਤ ਖਬਰਾਂ ਦਾ ਗੰਭੀਰ ਨੋਟਿਸ ਲੈਂਦਿਆਂ ਸ੍ਰੀ ਗਿੱਲ ਨੇ ਕਿਹਾ ਕਿ ਇਸ ਸਭ ਕੁਝ ਲਈ ਸੁਰੇਸ਼ ਕਲਮਾਡੀ ਸਿੱਧੇ ਤੌਰ 'ਤੇ ਜ਼ਿੰਮੇਵਾਰ ਹੈ।

ਨਵੀਂ ਦਿੱਲੀ 20 ਅਗਸਤ-
        ਰਾਸ਼ਟਰ ਮੰਡਲ ਖੇਡਾਂ 'ਚ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦੀ ਸਖ਼ਤੀ ਨਾਲ ਜਾਂਚ ਕੀਤੇ ਜਾਣ ਦੀ ਮੰਗ ਕਰਦੇ ਹੋਏ ਰਾਸ਼ਟਰ ਮੰਡਲ ਖੇਡ ਮਹਾਸੰਘ (ਸੀ. ਜੀ. ਐਫ.) ਦੇ ਪ੍ਰਧਾਨ ਮਾਈਕ ਫੋਨੇਲ ਨੇ ਕਿਹਾ ਕਿ ਉਹ ਇਸ ਸੰਤੁਸ਼ਟੀ ਦੇ ਨਾਲ ਭਾਰਤ ਤੋਂ ਵਾਪਿਸ ਰਵਾਨਾ ਹੋ ਰਹੇ ਹਨ ਕਿ ਇਨ੍ਹਾਂ ਖੇਡਾਂ ਦੇ ਸਾਰੇ ਸਟੇਡੀਅਮ ਲਗਭਗ ਤਿਆਰ ਹਨ, ਪਰ ਅਜੇ ਵੀ ਕੁਝ ਚਿੰਤਾਵਾਂ ਹਨ ਜਿੰਨ੍ਹਾਂ ਸਬੰਧੀ ਪ੍ਰਬੰਧਕ ਕਮੇਟੀ ਨੂੰ ਤੁਰੰਤ ਧਿਆਨ ਦੇਣ ਲਈ ਕਿਹਾ ਗਿਆ ਹੈ। 
        ਮੀਡੀਆ ਵਿਚ ਖੇਡਾਂ 'ਚ ਭ੍ਰਿਸ਼ਟਾਚਾਰ ਸਬੰਧੀ ਆ ਰਹੀਆਂ ਖਬਰਾਂ ਪ੍ਰਤੀ ਚਿੰਤਾ ਪ੍ਰਗਟ ਕਰਦੇ ਹੋਏ ਦੋ ਦਿਨ ਦੇ ਭਾਰਤ ਦੌਰੇ 'ਤੇ ਆਏ ਫੋਨੇਲ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਅਸੀਂ ਮੰਗ ਕਰਦੇ ਹਾਂ ਕਿ ਇਨ੍ਹਾਂ ਦੋਸ਼ਾਂ ਦੀ ਦੇਸ਼ ਦੇ ਕਾਨੂੰਨ ਦੇ ਤਹਿਤ ਜਾਂਚ ਹੋਣੀ ਚਾਹੀਦੀ ਹੈ। ਫੋਨੇਲ ਨੇ ਆਪਣੇ ਦੋ ਦਿਨਾਂ ਦੇ ਦੌਰੇ ਦੌਰਾਨ ਦਿੱਲੀ ਰਾਸ਼ਟਰ ਮੰਡਲ ਖੇਡਾਂ ਦੌਰਾਨ ਹੋਣ ਵਾਲੇ 17 ਮੁਕਾਬਲਿਆਂ ਦੇ ਸਟੇਡੀਅਮਾਂ ਦਾ ਬਾਰੀਕੀ ਨਾਲ ਨਿਰੀਖਣ ਕਰਨ ਦੇ ਬਾਅਦ ਕਿਹਾ ਕਿ ਮੈਂ ਸੰਤੁਸ਼ਟ ਹਾਂ ਸਟੇਡੀਅਮ ਤਿਆਰ ਹੋ ਗਏ ਹਨ ਪਰ ਅਜੇ ਵੀ ਕੁਝ ਚੀਜ਼ਾਂ ਚਿੰਤਾ ਦਾ ਵਿਸ਼ਾ ਹਨ, ਜਿਨ੍ਹਾਂ ਵੱਲ ਪ੍ਰਬੰਧਕ ਕਮੇਟੀ ਨੂੰ ਤੁਰੰਤ ਧਿਆਣ ਦੇਣਾ ਪਵੇਗਾ।
        ਫੋਨੇਲ ਨੇ ਕਿਹਾ ਕਿ ਇਨ੍ਹਾਂ ਸਟੇਡੀਅਮਾਂ ਦੇ ਨੇੜਿਓ ਗੰਦਗੀ ਅਤੇ ਮਲਬਾ ਆਦਿ ਤੁਰੰਤ ਸਾਫ ਕਰਵਾਇਆ ਜਾਣਾ ਚਾਹੀਦਾ ਹੈ। ਇਸ ਦੇ ਇਲਾਵਾ ਖੇਡ ਪਿੰਡ ਦਾ ਕੰਮ ਵੀ ਨਿਰਧਾਰਿਤ ਸਮੇਂ ਤੋਂ ਪਿੱਛੇ ਚੱਲ ਰਿਹਾ ਹੈ। ਪ੍ਰਬੰਧਕ ਕਮੇਟੀ ਨੂੰ ਇਸ ਵੱਲ ਤੁਰੰਤ ਧਿਆਣ ਦੇਣਾ ਚਾਹੀਦਾ ਹੈ।

ਪਟਿਆਲਾ 20 ਅਗਸਤ-
        ਅਰਜਨਟੀਨਾ 'ਚ 29 ਅਗਸਤ ਤੋਂ ਹੋਣ ਵਾਲੇ ਮਹਿਲਾ ਵਿਸ਼ਵ ਕੱਪ ਹਾਕੀ ਟੂਰਨਾਮੈਂਟ 'ਚ ਭਾਰਤ ਦੀ ਟੀਮ ਦਾ ਖੇਡਣਾ ਤੈਅ ਹੋ ਗਿਆ ਹੈ। 
        ਕਈ ਦਿਨਾਂ ਤੋਂ ਅਟਕਲਾਂ ਦੇ ਦੌਰ 'ਚੋਂ ਗੁਜ਼ਰ ਰਹੀ ਕੌਮੀ ਟੀਮ ਨੂੰ ਕੇਂਦਰੀ ਖੇਡ ਮੰਤਰਾਲੇ ਵੱਲੋਂ ਪ੍ਰਵਾਨਗੀ ਮਿਲਣ ਅਤੇ ਹਵਾਈ ਉਡਾਣ ਦਾ ਸਮਾਂ ਤਹਿ ਹੋਣ ਉਪਰੰਤ ਇਹ ਗੱਲ ਯਕੀਨੀ ਹੋ ਗਈ ਹੈ ਕਿ ਭਾਰਤੀ ਟੀਮ ਵਿਸ਼ਵ ਕੱਪ 'ਚ ਖੇਡੇਗੀ। ਇਥੇ ਐਨ. ਆਈ. ਐਸ. ਵਿਖੇ ਪਿਛਲੇ 10 ਦਿਨਾਂ ਤੋਂ ਚੱਲ ਰਹੇ ਕੈਂਪ ਦੀ ਅੱਜ ਸਮਾਪਤੀ ਉਪਰੰਤ ਟੀਮ ਨੇ ਸ਼ਾਮ ਦੇ ਸੈਸ਼ਨ 'ਚ ਆਰਾਮ ਕੀਤਾ ਅਤੇ 21 ਅਗਸਤ ਸਵੇਰੇ 4 ਵਜੇ ਵਾਇਆ ਦੋਹਾ (ਕਤਰ) ਅਰਜਨਟੀਨਾ ਜਾਣ ਵਾਲਾ ਕਤਰ ਏਅਰ ਲਾਈਨਜ਼ ਦਾ ਜਹਾਜ਼ ਫੜਨ ਲਈ ਅੱਜ ਤਿਆਰੀਆਂ ਆਰੰਭ ਕਰ ਦਿੱਤੀਆਂ, ਪਰ ਅਜੇ ਤੱਕ ਇਹ ਰਹੱਸ ਬਣਿਆ ਹੋਇਆ ਹੈ ਕਿ ਟੀਮ ਹਾਕੀ ਇੰਡੀਆ ਵੱਲੋਂ ਖੇਡੇਗੀ ਜਾਂ ਭਾਰਤ ਸਰਕਾਰ ਦੇ ਬੈਨਰ ਹੇਠ ਜਾਵੇਗੀ। 
        ਕੇਂਦਰੀ ਖੇਡ ਮੰਤਰਾਲੇ ਵੱਲੋਂ 18 ਖਿਡਾਰਨਾਂ, ਕੋਚ ਇੰਚਾਰਜ ਸੰਦੀਪ ਸੋਮੇਸ਼, ਕੋਚ ਸੰਦੀਪ ਕੌਰ, ਪ੍ਰੀਤਮ ਠਾਕੁਰ, ਗੋਲ ਕੀਪਿੰਗ ਕੋਚ ਖਾਲਿਦ ਮੋਦੀ, ਮੈਨੈਜਰ ਰੂਪਾ ਸੈਣੀ, ਡਾ: ਵਿਮਲਾ ਭਾਟੀਆ, ਫਿਜੀਓਥਰੈਪਿਸਟ ਅੰਕਿਤਾ ਟੰਡਨ ਤੇ ਵੀਡੀਓ ਵਿਸਲੇਸ਼ਕ ਨਲਿਨੀ ਸਮੇਤ ਕੁੱਲ 26 ਮੈਂਬਰੀ ਦਲ ਨੂੰ ਵਿਸ਼ਵ ਕੱਪ 'ਚ ਜਾਣ ਦੀ ਪ੍ਰਵਾਨਗੀ ਦਿੱਤੀ ਹੈ। ਟੀਮ ਲਈ ਕਿੱਟ ਟੀ. ਕੇ. ਸਪੋਰਟਸ ਜਲੰਧਰ ਤੋਂ ਬਣਾਈ ਗਈ ਹੈ। ਖ਼ਬਰ ਲਿਖੇ ਜਾਣ ਤੱਕ ਟੀਮ ਕੋਲ ਕਿੱਟ ਨਹੀਂ ਪਹੁੰਚੀ ਸੀ ਅਤੇ ਦੇਰ ਰਾਤ ਤੱਕ ਪਹੁੰਚਣ ਦੀ ਸੰਭਾਵਨਾ ਹੈ। ਜਿਸ ਕਾਰਨ ਅਜੇ ਤੱਕ ਇਹ ਗੱਲ ਸਾਫ਼ ਨਹੀਂ ਹੋਈ ਕਿ ਟੀਮ ਦੀ ਕਿੱਟ 'ਤੇ ਕਿਸ ਸੰਸਥਾ ਦਾ ਲੋਗੋ ਲੱਗੇਗਾ। 
        ਟੀਮ ਨੂੰ ਸਹਾਰਾ ਗਰੁੱਪ ਵੱਲੋਂ ਸਪਾਂਸਰ ਕੀਤਾ ਗਿਆ ਹੈ, ਪਰ ਅਜੇ ਤੱਕ ਇਹ ਰਹੱਸ ਬਣਿਆ ਹੋਇਆ ਹੈ ਕਿ ਟੀਮ ਕਿਸ ਸੰਸਥਾ ਵੱਲੋਂ ਖੇਡੇਗੀ। ਜ਼ਿਕਰਯੋਗ ਹੈ ਕਿ ਦੇਸ਼ ਦੀ ਸਰਬਉੱਚ ਅਦਾਲਤ ਨੇ ਬੀਤੇ ਦਿਨੀਂ ਆਰਜ਼ੀ ਤੌਰ 'ਤੇ ਹਾਕੀ ਇੰਡੀਆ ਨੂੰ ਟੀਮ ਲੈ ਜਾਣ ਦੀ ਆਗਿਆ ਦੇ ਦਿੱਤੀ ਸੀ। ਸੂਤਰਾਂ ਤੋਂ ਪਤਾ ਲੱਗਿਆ ਹੈ ਕਿ ਟੀਮ ਪ੍ਰਬੰਧਕਾਂ ਨਾਲ ਵਿਸ਼ਵ ਕੱਪ ਜਾਣ ਸਬੰਧੀ ਚਿੱਠੀ ਪੱਤਰ ਤੇ ਫੋਨ ਵਾਰਤਾ ਸਪੋਰਟਸ ਅਥਾਰਟੀ ਆਫ਼ ਇੰਡੀਆ ਵੱਲੋਂ ਹੀ ਕੀਤਾ ਜਾ ਰਿਹਾ ਹੈ।

ਦਾਂਬੁਲਾ 16 ਅਗਸਤ-
        ਨਿਊਜ਼ੀਲੈਂਡ ਦੇ ਹੱਥੋਂ ਸ਼ੁਰੂਆਤੀ ਮੈਚ 'ਚ ਕਰਾਰੀ ਹਾਰ ਦੇ ਬਾਅਦ ਸੱਟਾਂ ਤੋਂ ਪ੍ਰੇਸ਼ਾਨ ਭਾਰਤ ਨੇ ਜੇਕਰ ਤਿਕੋਣੀ ਇਕ ਰੋਜਾਂ ਲੜੀ 'ਚ ਆਪਣੀਆਂ ਉਮੀਦਾਂ ਨੂੰ ਬਰਕਰਾਰ ਰੱਖਣਾ ਹੈ ਤਾਂ ਸੋਮਵਾਰ ਨੂੰ ਸ੍ਰੀਲੰਕਾ ਦੇ ਖ਼ਿਲਾਫ਼ ਖੇਡੇ ਜਾਣ ਵਾਲੇ ਮੈਚ 'ਚ ਆਪਣੀ ਖੇਡ 'ਚ ਸੁਧਾਰ ਕਰਦੇ ਹੋਏ ਜਿੱਤ ਦਰਜ ਕਰਨੀ ਪਵੇਗੀ।
        ਉਥੇ ਭਾਰਤ ਲਈ ਮੁਸ਼ਕਿਲਾਂ 'ਚ ਹੋਰ ਵਾਧਾ ਹੁੰਦਾ ਜਾ ਰਿਹਾ ਹੈ। ਯੁਵਰਾਜ ਸਿੰਘ ਨੂੰ ਡੇਂਗੂ ਹੋ ਗਿਆ ਹੈ ਅਤੇ ਉਹ ਕੱਲ੍ਹ ਦੇ ਮੈਚ 'ਚ ਖੇਡ ਨਹੀਂ ਸਕੇਗਾ। ਭਾਰਤ ਨੂੰ ਲੜੀ ਦੇ ਪਹਿਲੇ ਮੈਚ 'ਚ ਨਿਊਜ਼ੀਲੈਂਡ ਦੇ ਹੱਥੋਂ 200 ਦੌੜਾਂ ਨਾਲ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ ਅਤੇ ਟੀਮ ਰਾਂਗਿਰੀ ਸਟੇਡੀਅਮ ਦੀਆਂ ਅਭਿਆਸ ਸਹੂਲਤਾਂ ਤੋਂ ਵੀ ਨਾਰਾਜ਼ ਹੈ ਅਤੇ ਕਥਿਤ ਤੌਰ 'ਤੇ ਬੀ. ਸੀ. ਸੀ. ਆਈ. ਨੂੰ ਪੱਤਰ ਲਿਖ ਕੇ ਇਸ ਤਰ੍ਹਾਂ ਦੇ ਰੁਝੇਵੇ ਵਾਲੇ ਕਾਰਜਕ੍ਰਮ 'ਤੇ ਰੋਕ ਲਗਾਉਣ ਲਈ ਕਿਹਾ ਹੈ। 
        ਸੱਟਾਂ ਨੇ ਟੀਮ ਦਾ ਸੰਤੁਲਨ ਵਿਗਾੜ ਦਿੱਤਾ ਹੈ ਅਤੇ ਗੋਡੇ ਦੀ ਸੱਟ ਤੋਂ ਠੀਕ ਹੋ ਰਹੇ ਇਸ਼ਾਂਤ ਸ਼ਰਮਾ ਦੇ ਕਵਰ ਵਜੋਂ ਮੁਨਾਫ ਪਟੇਲ ਨੂੰ ਬੁਲਾਇਆ ਗਿਆ ਹੈ। ਨਿਊਜ਼ੀਲੈਂਡ ਦੇ ਖ਼ਿਲਾਫ਼ 88 ਦੌੜਾਂ 'ਤੇ ਢੇਰ ਹੋਣ ਦੇ ਬਾਅਦ ਭਾਰਤ ਨੂੰ ਕਾਫੀ ਸਵਾਲਾਂ ਦੇ ਹੱਲ ਲੱਭਣੇ ਪੈਣਗੇ। ਸਚਿਨ ਤੇਂਦੁਲਕਰ, ਗੌਤਮ ਗੰਭੀਰ ਅਤੇ ਹਰਭਜਨ ਸਿੰਘ ਵਰਗੇ ਅਨੁਭਵੀ ਖਿਡਾਰੀਆਂ ਦੀ ਗੈਰਮੌਜੂਦਗੀ 'ਚ ਭਾਰਤੀ ਬੱਲੇਬਾਜ਼ਾਂ ਉਨ੍ਹੀ ਮਜ਼ਬੂਤ ਨਜ਼ਰ ਨਹੀਂ ਆਉਂਦੀ। ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਵਰਗੇ ਬੱਲੇਬਾਜ਼ ਵੀ ਨਿਰੰਤਰ ਵਧੀਆ ਪ੍ਰਦਰਸ਼ਨ ਨਹੀਂ ਕਰ ਰਹੇ। ਤੇਜ਼ ਗੇਂਦਬਾਜ਼ ਜ਼ਹੀਰ ਖਾਨ ਦੀ ਗੈਰਮੌਜੂਦਗੀ 'ਚ ਪ੍ਰਵੀਨ ਕੁਮਾਰ ਅਤੇ ਆਸ਼ੀਸ਼ ਨਹਿਰਾ ਨੇ ਵੀ ਵਧੀਆ ਪ੍ਰਦਰਸ਼ਨ ਕੀਤਾ ਹੈ ਪਰ ਵਿਚਲੇ ਓਵਰਾਂ 'ਚ ਉਨ੍ਹਾਂ ਨੂੰ ਦੂਸਰੇ ਗੇਂਦਬਾਜ਼ਾਂ ਤੋਂ ਮਦਦ ਨਹੀਂ ਮਿਲ ਰਹੀ ਹੈ। 
        ਨਿਊਜ਼ੀਲੈਂਡ ਦੇ ਖ਼ਿਲਾਫ਼ ਭਾਰਤ ਨੇ ਪਹਿਲੇ 10 ਓਵਰਾਂ 'ਚ ਰਾਸ ਟੇਲਰ ਦੀ ਟੀਮ ਦਾ ਸਕੋਰ ਤਿੰਨ ਵਿਕਟਾਂ 'ਤੇ 28 ਕਰ ਦਿੱਤਾ ਸੀ ਪਰ ਇਸ ਦੇ ਬਾਅਦ ਵਿਚਲੇ ਓਵਰਾਂ 'ਚ ਢਿੱਲੀ ਗੇਂਦਬਾਜ਼ੀ ਦੇ ਕਾਰਨ ਟੀਮ ਨੂੰ 289 ਦੌੜਾਂ ਦਾ ਟੀਚੇ ਦਾ ਪਿੱਛਾ ਕਰਨਾ ਪਿਆ। ਦੂਸਰੇ ਪਾਸੇ ਸ੍ਰੀਲੰਕਾ ਦੀ ਟੀਮ ਨੇ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਜਿੱਤ ਦੇ ਨਾਲ ਕੀਤੀ ਅਤੇ ਨਿਊਜ਼ੀਲੈਂਡ ਨੂੰ ਸਖ਼ਤ ਮੁਕਾਬਲੇ 'ਚ ਹਰਾਇਆ। ਲੇਸਿਥ ਮਲਿੰਗਾ ਅਤੇ ਏਜੰਲੋ ਮੈਥਿਊਜ਼ ਨੇ ਨਿਊਜ਼ੀਲੈਂਡ ਦੇ ਖ਼ਿਲਾਫ਼ ਗੇਂਦਬਾਜ਼ੀ 'ਚ ਵਧੀਆਂ ਪ੍ਰਦਰਸ਼ਨ ਕੀਤਾ ਪਰ ਬੱਲੇਬਾਜ਼ੀ 'ਚ ਸੁਧਾਰ ਦੀ ਉਮੀਦ ਹੈ। 
        ਪਿੱਚ ਦੇ ਅਨਿਯਮਤ ਉਛਾਲ ਨੇ ਮੇਜ਼ਬਾਨ ਟੀਮ ਦੇ ਬੱਲੇਬਾਜ਼ਾਂ ਨੂੰ ਪ੍ਰੇਸ਼ਾਨ ਕੀਤਾ ਅਤੇ ਜੇਕਰ ਸਲਾਮੀ ਬੱਲੇਬਾਜ਼ ਥਰੰਗਾ ਧੀਰਜ ਨਾਲ ਪਾਰੀ ਨਾ ਖੇਡਦਾ ਤਾਂ ਨਿਊਜ਼ੀਲੈਂਡ ਦੀ ਟੀਮ ਇਕ ਹੋਰ ਉਲਟਫੇਰ ਕਰਨ 'ਚ ਸਫਲ ਹੋ ਸਕਦੀ ਸੀ। ਭਾਰਤੀ ਗੇਂਦਬਾਜ਼ਾਂ ਨੂੰ ਦਿਲਸ਼ਾਨ, ਸੰਗਾਕਾਰਾ, ਜੈਵਰਧਨੇ ਅਤੇ ਥਰੰਗਾ ਵਰਗੇ ਬੱਲੇਬਾਜ਼ਾਂ ਨੂੰ ਰੋਕਣ 'ਚ ਪ੍ਰੇਸ਼ਾਨੀ ਹੋ ਸਕਦੀ ਹੈ। ਟਾਸ ਵੀ ਕਾਫੀ ਅਹਿਮ ਸਾਬਿਤ ਹੋਵੇਗਾ ਕਿਉਂਕਿ ਬਾਅਦ 'ਚ ਬੱਲੇਬਾਜ਼ੀ ਕਰਨ ਵਾਲੀਆਂ ਟੀਮਾਂ ਸ਼ਿਕਾਇਤ ਕਰ ਚੁੱਕੀਆਂ ਹਨ ਕਿ ਫਲੱਡਲਾਈਟ ਕੋਈ ਬਹੁਤੀ ਪ੍ਰਭਾਵਸ਼ਾਲੀ ਨਹੀਂ ਹੈ।

ਜਲੰਧਰ 16 ਅਗਸਤ-
        ਰਾਸ਼ਟਰ ਮੰਡਲ ਖੇਡਾਂ ਤੋਂ ਬਾਅਦ ਨਵੀਂ ਦਿੱਲੀ ਦੇ ਛਤਰਸ਼ਾਲ ਸਟੇਡੀਅਮ ਤੇ ਤਿਆਗਰਾਜ ਸਟੇਡੀਅਮ ਨੂੰ ਦਿੱਲੀ ਸਰਕਾਰ ਵੱਲੋ ਯੰਗ ਖਿਡਾਰੀਆਂ ਲਈ ਤਿਆਰ ਕਰਵਾਉਣ ਦੀ ਯੋਜਨਾ ਹੈ ਤੇ ਇਨ੍ਹਾਂ ਦਾ ਸਹੀ ਉਪਯੋਗ ਯੰਗ ਟੇਲੈਂਟ ਸਰਚ ਲਈ ਕੀਤਾ ਜਾਵੇਗਾ। 
        ਇਨ੍ਹਾਂ ਸਟੇਡੀਅਮਾਂ ਵਿਚ ਸਵੇਰੇ ਤੇ ਸ਼ਾਮ ਕੋਚਿੰਗ ਕਲਾਸਾਂ ਚਲਾਈਆਂ ਜਾਣਗੀਆਂ। ਇਹ ਜਾਣਕਾਰੀ ਸਿੱਖਿਆ ਮੰਤਰੀ ਨਵੀਂ ਦਿੱਲੀ ਅਰਵਿੰਦਰ ਸਿੰਘ ਲਵਲੀ ਵੱਲੋਂ ਦਿੱਤੀ ਗਈ। ਉਨ੍ਹਾਂ ਦੱਸਿਆ ਕਿ ਖਿਡਾਰੀਆਂ ਨੂੰ ਤਿਆਰ ਕਰਨ ਲਈ ਸਿੱਖਿਆ ਵਿਭਾਗ ਵੱਲੋਂ 600 ਕੋਚ ਭਰਤੀ ਕੀਤੇ ਜਾਣ ਸਬੰਧੀ ਫ਼ੈਸਲਾ ਕੀਤਾ ਗਿਆ ਹੈ। ਸਿੱਖਿਆ ਵਿਭਾਗ ਦੇ ਐਡੀਸ਼ਨਲ ਡਾਇਰੈਕਟਰ ਸਪੋਰਟਸ ਸਤਪਾਲ ਨੇ ਦੱਸਿਆ ਕਿ ਛਤਰਸ਼ਾਲ ਸਟੇਡੀਅਮ ਵਿਚ 5 ਹਜ਼ਾਰ ਤੋਂ ਜ਼ਿਆਦਾ ਨੌਜਵਾਨ ਖਿਡਾਰੀਆਂ ਨੂੰ ਟ੍ਰੇਨਿੰਗ ਦੇਣ ਦਾ ਇਰਾਦਾ ਹੈ। 
        ਇਸ ਸਟੇਡੀਅਮ ਵਿਚ ਲਾਅਨ ਟੈਨਿਸ, ਫੁੱਟਬਾਲ, ਬਾਸਕਿਟਬਾਲ, ਅਥਲੈਟਿਕਸ ਦੀਆਂ ਵਧੀਆ ਸਹੂਲਤਾਂ ਹਨ ਤੇ ਇਸ ਦੇ ਨਾਲ ਕੁਸ਼ਤੀ ਦੇ ਸਟੇਡੀਅਮ ਨੂੰ ਨਵੀਂ ਦਿੱਖ ਪ੍ਰਦਾਨ ਕਰਕੇ ਏਅਰ ਕੰਡੀਸ਼ਨਰ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ ਤਿਆਗਰਾਜ ਸਟੇਡੀਅਮ ਵਿਖੇ 2 ਹਜ਼ਾਰ ਖਿਡਾਰੀਆਂ ਨੂੰ ਸਿਖਲਾਈ ਦੇਣ ਦਾ ਪ੍ਰੋਗਰਾਮ ਹੈ ਤੇ ਇਥੇ ਸਿੱਖਿਆ ਵਿਭਾਗ ਦੇ ਦਫ਼ਤਰ ਤੇ ਛਤਰਸ਼ਾਲ ਸਟੇਡੀਅਮ ਵਿਚ ਐਡੀਸ਼ਨਲ ਡਾਇਰੈਕਟਰ ਸਪੋਰਟਸ ਦਾ ਦਫ਼ਤਰ ਹੋਵੇਗਾ। 
        ਉਨ੍ਹਾਂ ਨੇ ਕਿਹਾ ਕਿ ਖੇਡਾਂ ਤੋਂ ਬਾਅਦ ਇਨ੍ਹਾਂ ਸਟੇਡੀਅਮਾਂ ਦੀ ਸਾਂਭ ਸੰਭਾਲ ਲਈ ਮੰਤਰਾਲੇ ਵੱਲੋਂ ਟੈਂਡਰ ਜਾਰੀ ਕੀਤੇ ਜਾਣਗੇ ਤੇ ਪਬਲਿਕ-ਪ੍ਰਾਈਵੇਟ ਪਾਰਟਨਰਸ਼ਿਪ ਤਹਿਤ ਇਸ 'ਤੇ ਕੰਮ ਕੀਤਾ ਜਾਵੇਗਾ। ਸਤਪਾਲ ਨੇ ਕਿਹਾ ਕਿ ਯੋਗ ਖਿਡਾਰੀਆਂ ਨੂੰ ਕੌਮਾਂਤਰੀ ਦਰਜਾ ਦਿਵਾਉਣ ਲਈ ਇਨ੍ਹਾਂ ਸਟੇਡੀਅਮਾਂ ਦਾ ਇਸਤੇਮਾਲ ਕੀਤਾ ਜਾਵੇਗਾ ਤੇ ਇਸ ਤੋਂ ਇਲਾਵਾ ਸੀਨੀਅਰ ਸਿਟਜ਼ਨ ਨੂੰ ਵੀ ਥੋੜ੍ਹੀ ਫੀਸ ਨਾਲ ਇਨ੍ਹਾਂ ਸਟੇਡੀਅਮਾਂ ਵਿਚ ਐਂਟਰੀ ਦਿੱਤੀ ਜਾਵੇਗੀ।

ਦਾਂਬੁਲਾ 16 ਅਗਸਤ-
        ਵਿਵਾਦਾਂ ਅਤੇ ਭ੍ਰਿਸ਼ਟਾਚਾਰ ਦੇ ਕਥਿਤ ਦੋਸ਼ਾਂ ਦੇ ਬਾਵਜੂਦ ਭਾਰਤੀ ਕਪਤਾਨ ਮਹਿੰਦਰ ਸਿੰਘ ਧੋਨੀ ਨੇ ਅੱਜ ਉਮੀਦ ਪ੍ਰਗਟ ਕੀਤੀ ਕਿ ਅਕਤੂਬਰ 'ਚ ਦਿੱਲੀ ਵਿਚ ਹੋਣ ਵਾਲੀਆਂ ਰਾਸ਼ਟਰ ਮੰਡਲ ਖੇਡਾਂ ਨਾਲ ਦੇਸ਼ ਦਾ ਮਾਣ ਵਧੇਗਾ। 
        3 ਤੋਂ 14 ਅਕਤੂਬਰ ਤੱਕ ਹੋਣ ਵਾਲੀਆਂ ਖੇਡਾਂ ਦੀਆਂ ਤਿਆਰੀਆਂ ਸਬੰਧੀ ਕਥਿਤ ਤੌਰ 'ਤੇ ਭ੍ਰਿਸ਼ਟਾਚਾਰ ਅਤੇ ਸਟੇਡੀਅਮਾਂ ਦੇ ਨਿਰਮਾਣ 'ਚ ਦੇਰੀ ਨਾਲ ਕਾਫੀ ਨੁਕਸਾਨ ਪਹੁੰਚ ਰਿਹਾ ਹੈ, ਜਿਸ ਕਾਰਨ ਕੱਲ੍ਹ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਨੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਹੰਗਾਮੀ ਮੀਟਿੰਗ ਬੁਲਾਈ ਸੀ। ਦੇਸ਼ ਦੇ 64ਵੇਂ ਆਜ਼ਾਦੀ ਦਿਹਾੜੇ ਮੌਕੇ ਧੋਨੀ ਨੇ ਕਿਹਾ ਕਿ ਦੇਸ਼ ਨੂੰ ਸਿਰਫ ਰਾਸ਼ਟਰਮੰਡਲ ਖੇਡਾਂ ਦੀ ਸਫਲ ਮੇਜ਼ਬਾਨੀ ਦੇ ਲਈ ਹੀ ਨਹੀਂ ਬਲਕਿ ਅਗਲੇ ਸਾਲ ਹੋਣ ਵਾਲੇ ਕ੍ਰਿਕਟ ਵਿਸ਼ਵ ਕੱਪ ਦੇ ਸਫਲ ਪ੍ਰਬੰਧਾਂ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। 
        ਧੋਨੀ ਨੇ ਕਿਹਾ ਕਿ ਆਜ਼ਾਦੀ ਦਿਹਾੜਾ ਸਾਡੇ ਲਈ ਅਹਿਮ ਹੈ। ਖੇਡ ਜਗਤ 'ਚ ਹੋਣ ਦੇ ਨਾਤੇ ਮੈਂ ਹੁਣ ਤੋਂ ਇਕ ਸਾਲ ਦੇ ਅੰਦਰ ਦੇਸ਼ 'ਚ ਹੋਣ ਵਾਲੇ ਦੋ ਵੱਡੇ ਟੂਰਨਾਮੈਂਟਾਂ ਦੇ ਸਫਲ ਰਹਿਣ ਦੀ ਕਾਮਨਾ ਕਰਦਾ ਹਾਂ। ਉਨ੍ਹਾਂ ਕਿਹਾ ਕਿ ਇਕ ਤਾਂ ਰਾਸ਼ਟਰਮੰਡਲ ਖੇਡਾਂ ਅਤੇ ਦੂਸਰਾ ਕ੍ਰਿਕਟ ਵਿਸ਼ਵ ਕੱਪ। ਉਮੀਦ ਹੈ ਕਿ ਅਸੀਂ ਇਨ੍ਹਾਂ ਦੀ ਸਫਲ ਮੇਜ਼ਬਾਨੀ ਕਰਾਂਗੇ। ਜਿਸ ਨਾਲ ਸਾਡੇ ਦੇਸ਼ ਦਾ ਮਾਣ ਵਧੇਗਾ। ਕ੍ਰਿਕਟ ਵਿਸ਼ਵ ਕੱਪ ਅਗਲੇ ਸਾਲ ਫਰਵਰੀ 'ਚ ਸ਼ੁਰੂ ਹੋਵੇਗਾ।

ਕਰਾਚੀ 16 ਅਗਸਤ-
        ਪਾਕਿਸਤਾਨੀ ਟੀਮ ਦੇ ਇਕ ਰੋਜਾਂ ਅਤੇ ਟਵੰਟੀ-20 ਕਪਤਾਨ ਸ਼ਾਹਿਦ ਅਫਰੀਦੀ ਨੂੰ ਲੱਗਦਾ ਹੈ ਕਿ ਉਨ੍ਹਾਂ ਦੀ ਟੀਮ ਇੰਗਲੈਂਡ ਦੇ ਮੌਜੂਦਾ ਦੌਰੇ 'ਤੇ ਇਸ ਲਈ ਜੂਝ ਰਹੀ ਹੈ ਕਿਉਂਕਿ ਖਿਡਾਰੀਆਂ 'ਚ ਟੈਸਟ ਕ੍ਰਿਕਟ ਦੇ ਲਈ ਜ਼ਰੂਰੀ ਜ਼ਜਬੇ ਦੀ ਕਮੀਂ ਹੈ। 
        ਪਾਕਿਸਤਾਨੀ ਟੀਮ ਆਸਟ੍ਰੇਲੀਆ ਅਤੇ ਇੰਗਲੈਂਡ ਦੇ ਖ਼ਿਲਾਫ਼ ਟੈਸਟ ਮੈਚਾਂ 'ਚ ਬੱਲੇਬਾਜ਼ੀ ਅਤੇ ਖੇਤਰਰੱਖਿਆ 'ਚ ਬੁਰੀ ਤਰ੍ਹਾਂ ਜੂਝ ਰਹੀ ਹੈ। ਅਫਰੀਦੀ ਪਿਛਲੇ ਮਹੀਨੇ ਆਸਟ੍ਰੇਲੀਆ ਤੋਂ ਪਹਿਲੇ ਟੈਸਟ 'ਚ ਪਾਕਿਸਤਾਨ ਨੂੰ ਮਿਲੀ ਕਰਾਰੀ ਹਾਰ ਦੇ ਬਾਅਦ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਕੇ ਦੇਸ਼ ਵਾਪਿਸ ਪਰਤ ਆਇਆ ਸੀ ਅਤੇ ਉਸ ਨੇ ਕਿਹਾ ਸੀ ਕਿ ਉਨ੍ਹਾਂ ਦੇ ਅੰਦਰ ਪੰਜ ਰੋਜਾਂ ਮੈਚ ਦੇ ਲਈ ਹੁਣ ਜ਼ਜਬਾ ਮੌਜੂਦ ਨਹੀਂ ਹੈ। 
        ਉਨ੍ਹਾਂ ਕਿਹਾ ਕਿ ਮੈਨੂੰ ਲਗਦਾ ਹੈ ਕਿ ਅਸੀਂ ਇੰਗਲੈਂਡ 'ਚ ਖਿਡਾਰੀਆਂ ਦੇ ਪ੍ਰਦਰਸ਼ਨ ਨੂੰ ਕਾਫੀ ਨੇੜਿਓ ਦੇਖਿਆ ਹੈ ਅਤੇ ਨਿਸ਼ਚਿਤ ਰੂਪ ਨਾਲ ਇਕ ਰੋਜਾ ਲੜੀ ਦੇ ਲਈ ਟੀਮ 'ਚ ਕੁਝ ਬਦਲਾਅ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਸਾਡੇ ਕੋਲ ਸੀਮਤ ਓਵਰਾਂ ਦੇ ਮੈਚਾਂ ਲਈ ਕਾਫੀ ਪ੍ਰਤਿਭਾਸ਼ਾਲੀ ਕ੍ਰਿਕਟਰ ਹਨ। ਇਕ ਹੋਰ ਸਵਾਲ ਦੇ ਜਵਾਬ 'ਚ ਅਫਰੀਦੀ ਨੇ ਕਿਹਾ ਕਿ ਉਸ ਦਾ ਆਈ. ਪੀ. ਐਲ. ਦੇ ਚੌਥੇ ਦੌਰ 'ਚ ਖੇਡਣ ਦੀ ਸੰਭਾਵਨਾ ਹੈ।

ਜਲੰਧਰ 16 ਅਗਸਤ-
        ਭਾਰਤੀ ਐਮੇਚਿਅਰ ਸਰਕਲ ਕਬੱਡੀ ਫੈਡਰੇਸ਼ਨ 7 ਸਤੰਬਰ ਤੋਂ ਹਿਮਾਚਲ ਪ੍ਰਦੇਸ਼, ਪੰਜਾਬ, ਹਰਿਆਣਾ, ਦਿੱਲੀ ਤੇ ਚੰਡੀਗੜ੍ਹ ਵਿਚ ਭਾਰਤ-ਪਾਕਿਸਤਾਨ ਸਰਕਲ ਸਟਾਈਲ ਕਬੱਡੀ ਮੈਚਾਂ ਦਾ ਆਯੋਜਨ ਕਰੇਗੀ। 
        ਇਹ ਜਾਣਕਾਰੀ ਸਰਕਲ ਸਟਾਈਲ ਕਬੱਡੀ ਫੈਡਰੇਸ਼ਨ ਦੇ ਪ੍ਰਧਾਨ ਯਸ਼ਪਾਲ ਅਗਰਵਾਲ ਤੇ ਉੱਪ-ਪ੍ਰਧਾਨ ਰਜਿੰਦਰ ਰਾਣਾ ਨੇ ਦੱਸਿਆ ਕਿ ਕੁਲ ਮਿਲਾ ਕੇ 15 ਮੈਚਾਂ ਦਾ ਆਯੋਜਨ ਕੀਤਾ ਜਾਵੇਗਾ। ਪਹਿਲਾ ਮੈਚ ਹਿਮਾਚਲ ਪ੍ਰਦੇਸ਼ ਦੇ ਸ਼ਹਿਰ ਹਮੀਰਪੁਰ ਵਿਖੇ ਖੇਡਿਆ ਜਾਵੇਗਾ। ਜਿਸ 'ਚ ਮੁੱਖ ਮਹਿਮਾਨ ਵਜੋਂ ਪ੍ਰੇਮ ਕੁਮਾਰ ਧੂਮਲ ਮੁੱਖ ਮੰਤਰੀ ਹਿਮਾਚਲ ਪ੍ਰਦੇਸ਼ ਹੋਣਗੇ। 
        ਸ੍ਰੀ ਅਗਰਵਾਲ ਨੇ ਦੱਸਿਆ ਕਿ ਪਾਕਿਸਤਾਨ ਦੀ ਸਰਕਲ ਸਟਾਈਲ ਕਬੱਡੀ ਟੀਮ 5 ਸਤੰਬਰ ਨੂੰ ਭਾਰਤ ਪੁੱਜੇਗੀ ਤੇ ਇਸ ਲੜੀ ਦਾ ਅੰਤਿਮ ਮੈਚ ਚੰਡੀਗੜ੍ਹ ਵਿਖੇ ਖੇਡਿਆ ਜੇਵਗਾ। ਉਨ੍ਹਾਂ ਨੇ ਦੱਸਿਆ ਕਿ ਫੈਡਰੇਸ਼ਨ ਵੱਲੋਂ ਹਰ ਮੈਚ ਦੀ ਜੇਤੂ ਟੀਮ ਨੂੰ 75000 ਰੁਪਏ ਤੇ ਉਪ-ਜੇਤੂ ਨੂੰ 50 ਹਜ਼ਾਰ ਰੁਪਏ ਇਨਾਮ ਦਿੱਤਾ ਜਾਵੇਗਾ।